2
اشعار الشاعره نور عبد الله




 

الشاعرة نور عبد الله 

لما يطخــــــــوه بالنـــــار

انا مش بستبعد حاجة
وخيالى مالوش اسوار
وانا عندى اموت على فكرة
ولا اعيشهامـــــــوت ياحمار
الثـــــــــــورة بدايــــــة الفكرة
والتغييــــــر بألاصــــــــرار
واللى بدأ عمــــــره ماريح
واللى متنح دا متنــــــــح
م الاول يا شطار
يبقى حنعمل كألأتى
خلى اللى يهاتى يهاتى
واللى بيحبــــط ومقريف
خلوه ومسيــــره حيعرف
ايه معنى كلمة شهــــــــــداء
لما يطخــــــوه بالنــــــــــــــــار
وتحية للى استشــــهد وأملنا فى الثـــــوار




بجـــــــاحة نوعها فريــــــــد

الديـــــة تمن الشهيــــد
وسامحوا بقى الرقــــــاص
لموا الجروح ع الصديــــــد
وقفــــــلوا وخــــــلاص
دى بجــــــاحة نوعها فريـــد
 ياأللى فرمتــــــــوا النـــــــاس
وليه فى الكتاب المجيـــــــد
اتقال لكل العبيـــــــد
ليكم حيـــــــــاة فى القصــــــــــاص؟؟؟؟؟؟؟؟؟

غير ع الجرح

وفتحنا الجرح يا مصر عشان مانشيل سرطان
والجرح عشان يتلم اكيد يلزمه تنضيف
وانا كل ماأغيرلك ع الجرح فى اى ميدان
القى اللى يقول أى أى سيبونى..ابوقلب ضعيف
وجعاهم لمتنا وفوضى...انما موت انسان
ماوجعش الا اللى فضل فيكى طول عمره شريف
والراجل يتفرق يا جماعة عن النسوان
بقوالة الحق ولومهما تكون التكاليف
واحنا نسواننا الواحدة بقى منهم بميـــــدان
من اللى بيهتفوا للكــــــــــلب هتاف اصفــــر ورسخيــــــف



الليـــلة عيـــد


البس هدومك وإنزل المشوار
سلم كأنك جاى بعد شوية
حط فى جيوبك كام جنيه أحرار
يوصلوك لسكة رايحة و بس مالهاش جاية
ظبط كده نفسك دا مشوار مهم..انت النهاردة يا عم تبقى النجم
خطوات اهى بينك وبين الحلم..لحظات وتبقى ياعم حاجة تانية
حلو النهاردة انت بزادة بجد يا ابن إلأيه
اوقات اغير منك واقول اشمعنى هو وليه؟؟
صورك حتملأ الدنيا وجميلك حيبقى علينا
انت حتتصيت وتبقى انت اللى عدى فيها
وانت اللى حتوسع عشاننا السكة وتعدينا
اوقات اقول اشمعنى يعنى انت؟؟؟
ما انا كنت جنبك كتف لازق فى كتف
وهو كان حوالينا عمال يلف
ماهو سابنى لسبب..واختارك انت لسبب
اخلاق مبادىء أدب..مش كل من برضه يليق انه يا ناس يتزف..وبالعلم يتلف
انت يا واصل يا معدى..زى ما بنقول بالبلدى..رايح ع الجنة حدف
والجنة محتاجة ايه غير هما حبة حاجات؟؟؟
دى تذكرة مترو توديك الميدان..فى وسط ناس جدعان
حنقول حتشرب فى الطريق عصير قصب بجنيه كمان؟؟
الجنة اهو تتراح بجوز جنيهات
صدقنى مش محتاجة غير حبة حاجات
امك حتقعد بين بقية الامهات وتقول اعـــــز عيــــــالى مات؟؟؟
سهلة اوى ..مش قولتلك حبة حاجات
تستغنى بس عن لؤا امك وابوك واخواتك
وتسيبلهم ريحتك مكانك فى السرير
فى اخر تيشيرت لبسته والا قميص..
ياخدوه فى احضانهمك يحسوا العمر كـــله رخيص
تسيبلهم ريحتك فى كل حاجاتك
تستغنى يعنى عن شارعكم..عن صحابك..قرايبك..جيرانك ..مستقبلك..مراتك ولادك
تستغنى أصـــلا عن حياتك
وتنزل كده تتمشى تدخل معركة ويا فريق الكلب
ناس نوعها كده زى الجزم..فى الشر تلقاهم حزم
فى قفصهم الصدرى تشوف مواتير ماتلقاش قلب
وما يعرفوش.. وما يفهموش
ولا انتفاضة وطن..ولا ضمير الشعب
شفت اللى بيمصوا الدما..والنور بيقتلهم ويحرقهم؟؟
اهما دول يقوا كده برضه الله يحرقهم
هما كلاب فعلا اوووى لكن مادام محتاجلهم يبقى خلاص
هما اللى واقفين يقطعوا للخلق تذكرة الخلاص
بجح وواجهك وألاالجبان قناص
سلم بصدرك ع الرصاص
الموت بييجى فى ثانية مش عايز ساعات
ميت بصوتك يسلم اللى ما موتوش كتر السكات
مش قولتلك الجنة ديتها يادوب حبة حاجات؟؟؟
مبروك ياعم..ايه يعنى كام طلقة وحبة دم؟؟حققت اغلى الامنيات
مش انت مصرى وكل مصرى من طفولته نفسه فى شوية حاجات؟؟
تحب تطلع ايه يا حبيبى لما تكبر؟؟؟
ظابط واموووت اسرائيل
طب لما يكبر..نفسك فى ايه؟؟
نفسى اما يبقى ربنا يوسع عليا ابنيلى جامع..واساعد اللى حالته تميل
طب قوللى ..ليك طلب اخير؟؟
لو ربنا أراد بيا خير...دا يبقى يااااااااااااااااه لو أموت شهيد
وأهو مات شهيد
مش عارفة دا أبكى عليه؟؟..والا أسبلله عينيه؟؟ وافرح واغنى الليلة عيد؟؟؟!!!

2 التعليقات:

إظهار التعليقات

سيتم نشر التعليق الخاص بك حينما يتم الموافقه عليه ..

 

اسمعنا | راديو , تلفزيون , بث مباشر © 2010-2012
Privacy Policy